an salmo san makalulu-oy

satjr. of Dimasalang


Sa tunga san kaduluman adi ako nagabakho,
Naga-agrangay, nagasiyak sa kasakit na dako.
Wara ako sin kaupod kundi sadiri na anino,
Wara man lang sin kabayaw sa kabug-at na pas-an ko.
An akon kamutangan isad na makalulu-oy,
Gintalikdan san mundo bagan tikamatay na kahoy.
Sa huna san kadamuan ako gayud uripon,
Wara kuno sin kantidad an akon kaugalingon.
An mata ko naghubag na sa wan udong na pag-tangis,.
An dughan ko nagpi-ot na kag baga na an nagnipis.
An kalag ko tikalupad na gayud sa panganoron,
Kay pagti-os na baktut-baktot, bagan di na kakayahon.
Nano ba kay may pag-ugtas didi sa aton kinab-an?
Di ba gayud mahimo na pirmi lang kalipayan?
Nano ba kay may luha tungod sa mga kapait?
Di ba pwede na puro lang paghiyom sa mga kanamit?
Nano ba kay mas damo sin tunok ini na buhay,
Kontra sa mga paglumpat sa kasadya kag kalipay?
Nano ba kay mas labaw an limba-ongon na agihan,
Kontra sa mahayahay kag trangkilo na dalan?
Nahangog na an utak ko san paniguron kaiisip,
Sani na mga bagay-bagay na sigen sinudip-sudip.
Nano man ba kay sugad sani? Nano man ba kay sugad sana?
Nano kay dili pwede ini? Nano kay dili pwede ina?
Sa kahidaluman sanin kontemplasyon,
Bumunok an uran, humarok sa akon.
Gin-anod ako sa lam-aw san kamunduan,
Nagpongak-pongak tawon kay waran matagalan.
Aduy!, an katugnaw dulot na sa akon bukog,
Kairo!, wara man lang sa tungod kon makakup-kop.
Nagkapa-kapa ako kag hapit na gayud malumos,
Kaya lang wa man sin makabulig sa akon tulos.
Apiki na gayud ako sa baba san kamalasan,
Nagahulat, naganga-nga tutunlon san kamatayan.
Aw nano man kay may tawo ako na nadumduman!,
Makabulig, makahatag sa akon sin kaligtasan.
Pumawa an kalibutan kag nakita ko Siya,
Ginhuyutan an kamot ko na maluya-luya na.
Ginkugos Niya ako kag gingakos sin maaayo,
Pinahidan an luha kag hinapuhap an bayhon ko.
Matam-is na nagtawa, humarok sa akon agtang,
Ginsabihan Niya ako na di ta ikaw papabay-an!
Adi Ako nagabantay sadto, yana, kag hasta na lang,
Idada-op an palad Ko san-o mo man kinahanglan.
Dili Ako magabag-o kay ungod an pagkamu-ot,
Abrihi lang an puso mo kag Ako magasulod.
Kaya ngani binaton Ko an pagpapako sa krus,
Kay gusto Ko kamo tanan sa kasal-an matubos.
An puso Ko nagalaad an kalu-oy sa iyo tanan,
Dili gayud mapaparong, wara inin kahumanan.
Sa Iya mga surmaton an isip ko na-abrihan,
Nabaton ko na an tanan didi sa duta may dahilan.
An pagpas-an gali san krus isad na paagi lang,
Na an pagtuod sumarig kag magbungan kaayuhan.
Amo ininn makabulong san tanan na kasakitan,
Nagagiya sa maliputok na porma san kalipayan.